ნატურალური რიცხვები საგანთა დასათვლელად გამოიყენება. ეს რიცხვებია: 1, 2, 3, 4, ... ნატურალურ რიცხვთა მიმდევრობა უსასრულოა. უდიდესი რიცხვი არ არსებობს. რიცხვების ჩასაწერად გამოიყენება თვლის სხვადასხვა სისტემა, მათ შორის ყველაზე პრაქტიკული გამოყენება აქვს თვლის ათობით სისტემას, რომლის ათი ციფრის: 0, 1, 2, 3, 4, 5, 6, 7, 8, 9 კომბინაციით მიიღება სხვადასხვა რიცხვები. მაგ: 372 021. ეს რიცხვი შეიცავს 1 ერთეულს, 2 ათეულს, 0 ასეულს, 2 ათასეულს, 7 ათეულ-ათასეულს და 3 ასეულ-ათასეულს. მოცემული რიცხვი თანრიგების შეკრების მიხედვით ასე ჩაიწერება:

372 021 = 300 000 + 20 000 + 2 000 + 20 + 1:

372 021 - არის რიცხვი, ხოლო 3, 7, 2, 0, 2 და 1 მისი შემადგენელი ციფრები.

5 - არის რიცხვი, რომელიც შეიცავს ერთ ციფრს და ეს არის 5.

ნატურალურ რიცხვთა სიმრავლეს აღნიშნავენ N ასოთი.

ორი ან მეტი რიცხვის შეკრების შედეგს მათი ჯამი ეწოდება, ხოლო რიცხვებს - შესაკრებები.

ნებისმიერი a, b და c რიცხვებისთის სრულდება ტოლობები:

a+b=b+a (გადანაცვლებადობის თვისება).

(a+b)+c=a+(b+c) (ჯუფდებადობის თვისება).

მაგალითად: (7 + 12) + 9 = 7 + (12 + 9) = 19 + 9 = 7 + 21 = 28.

ორი a და b რიცხვების სხვაობა აღინიშნება (a - b) -თი. a არის საკლები, b - მაკლები, შედეგი კი - სხვაობა.

ორი ან რამდენიმე რიცხვის ერთმანეთზე გამრავლების შედეგს ეწოდება მათი ნამრავლი, ხოლო თვით ამ რიცხვებს მამრავლები. ნებისმიერი a, b და c რიცხვებისთვის სრულდება:

a.b=b.a (გადანაცვლებადობის თვისება).

(a.b).c=a.(b.c) (ჯუფდებადობის თვისება).

(a+b).c=a.c+b.c (შეკრების განრიგებადობის თვისება).

(a-b).c=a.c-b.c (გამოკლების განრიგებადობის თვისება).

ორი a და b რიცხვების განაყოფი ანუ ფარდობა აღინიშნება ასე: a:b ან a/b, a არის გასაყოფი, b - გამყოფი, გაყოფის შედეგია - განაყოფი.

ორი ნატურალური რიცხვის განაყოფი შეიძლება იყოს ნატურალური რიცხვი, შეიძლება არა და გაყოფის შედეგად დაგვრჩეს ნაშთი, მაგალითად: 7:3=2 და ნაშთი დაგვრჩა 1.

ნებისმიერი რიცხვის ნამრავლი 1- ზე, თვით ეს რიცხვია (7.1=7), ხოლო 0-ზე 0-ია (7.0=0).

0-ზე გაყოფა არ შეიძლება!

სხივს რომელზეც მონიშნულია ათვლის წერტილი (0) და მასშტაბი (ერთეულის ტოლი მონაკვეთი) და დადებითი მიმართულება, რიცხვითი სხივი ეწოდება. ნულის მარჯვნივ მდებარეობს ნატურალური რიცხვები.

A წერტილის კოორდინატია 2, წერენ A(2), B წერტილის 6, წერენ B(6). მანძილი (0) სათავიდან ნატურალურ რიცხვამდე ტოლია მისი კოორდინატის.

A და B წერტეილებს შორის მანძილი გამოითვლება შემდეგნაირად; თუ A წერტილის კოორდინატია a და B წერტილის b, მაშინ ჩაიწერება: AB=b-a, დიდს გამოვაკლოთ პატარა.

ორი ნატურალური რიცხვიდან მეტია ის, რომელიც რიცხვით ღერძზე მდებარეობს მარჯვნივ.

---

შენიშვნა: მათემატიკური ცნებები ძირითადად წარმოდგენილია ეროვნული მისაღები გამოცდებისთვის განკუთვნილი სახელმძღვანელოდან - ავტორები: ს.თოფურია, ვ.ხოჭოლავა, ნ.მაჭარაშვილი, გ. აბესაძე, ზ. მეტრეველი.

განმარტება: პროფესორ ს. თოფურიას რედაქციით მეხუთე გადამუშავებული გამოცემა.